BUNG II-NA: SUB COMMITTEE HRANG HRANG

Unit TKP Executive Committee hnuaiah Tualchhung Kohhran Committee remtihnain thil tul bik leh mawhphurhna bik nei turin Sub-Committee hrang hrang din a ni. An mawhphurhna leh thuneihna te inkaihhruaina dan (Manual)-a lang bak chu Unit TKP Executive Committee-in a tul angin engemaw hun chhung atan a ruat thei ang. Sub-Committee-te term hi Unit TKP term angin kum khat a ni anga, kum laklawhah pawh Executive Committee-in tul a tih chuan eng hunah pawh a thiat (Dissolve) in an thuneihna leh mawhphurhna te pawh a tidanglam thei ang. Sub-Committee-te hi Unit TKP Executive Committee hnuaia awm an nih ang takin an hmalak dan pawh Unit TKP Executive Committee hriatpui leh duhdan a ni tur a ni. Sub-Committee-te hian anmahni thuin sumtuak leh sum hman theihna an nei lovang a, Executive Committee remtihnain sum an tuakin an hmang thei ang. Sub-Committee hrang hrang leh Colony-te hian ‘Record Bu’ an vawng anga, kum tawpah Unit Secretary hnenah an thehlut ang.

SECTION ‘A’:

PROPERTY COMMITTEE

1.	A din chhan: Unit TKP property-te enkawla vawng him tur leh mumal taka hman a nih theihna tura dante siam a kengkawh turin Property Committee hi din a ni.
2.	Memberte: Executive Committee in, Executive Committee member zinga mi, Property Committee Convener-ah a ruat ang. Secretary leh member dangte pawh Executive Committee-in a ruat thin anga, Unit TKP Asst. Secretary chu Ex-Officio member a ni ang. Convener leh Secretary baka mawhphurhna dangte chu Committee-in a mamawh dan azirin Committee member-te zingah chanvo an inbel ang a, Executive Committee-in a pawmpui ang.
3.	A tihturte: i) Unit TKP Property-te a vawng tha ang. ii) Unit TKP property siamthat (repair) ngai a awmin a siamtha (repair) ang. iii) Unit TKP Property-te hman leh hawh chhuah dan fel takin a siam ang. iv) Unit TKP property lei leh tihralah mawh a phur anga, Executive Committee remtihna lo chuan lei leh tihral theihna a nei lovang. v) Unit TKP in property thar a mamawhte Executive Committee-ah a neih theih dan tur ruahmanna leh rawtna a siam thei ang. vi) Property chungchanga thil tul danglam bikah chuan Unit TKP Office Bearer-te nen inrawnkhawmin thutawp an siam thin ang. vii) Tul bikah Unit TKP-in Property maintenance atan budget-a sum a dah chuan Executive Committee remtihna la kher lovin a dah zat atangin property maintenance atan 30% kumkhat chhungin a hmang thei ang. Executive Committee-ah a hman dan report a pe thin ang.
4.	Property Rules:
I.	i) TKP Ramzotlang Unit property-te hi Pathian rawngbawlna tur a ni a, Pathian ropuina tur leh a rawngbawlna atan chauh hman tur a ni. ii) Kan Unit leh Kohhran programme tibuai thei thil anih chuan kan Unit property-te hi hawh/hman theih a ni lovang. iii) Kan Unit property-te hi Property Committee phalna la lo chuan hawh/hman phal a ni lo.
II.	i) Pawl dang leh mimalin kan Unit property-te hi an hawh duh anih chuan Convener, Property Committee hnenah dilna siamin hawh man bituk angin hawh theih a ni ang. ii) Hawh man chu Property Committee hnenah pek tur a ni anga, hawh man hi pek lawk (Pre paid) tur a ni. iii) Property lak chhuah hmain a that leh that loh enfiah a, a zat chhinchhiah leh dahfel pawh Property Committee member-te hriatpuia tih thin tur a ni. iv) Property hawhchhuahte dah huna an dah loh chuan hawh man (rate) atanga chhutin nikhatah 50% in a pung ang. v) Kan Unit property-te hi hawh a nih a tihbo/tihchhiat a nih chuan a thar leina/siamthatna man a hawhtu ten an chawi tur a ni ang.
III.	i) Kan Unit musical instrument leh sound system-te hi TKP Ramzotlang Unit member, Kohhran Dan Puitlinga innei an awmin man chawi lovin kan Kohhran huam chhungah an hawh thei ang. A lakchhuah leh dah luh chungchangah Property Committtee member-te hriatpuia tih thin tur a ni. ii) Kan Unit property-te hi BCM Ramzotlang leh a hnuaia Fellowship hrang hrang ten BCM Ramzotlang huam chhungah Property Committee-te hriatpuinain man chawi lovin an hmang thei ang. iii) A chunga sawi lan loh thil tul bikah chuan kan Unit Office Bearer leh Property Committee-te inrawnkhawmin thu tawp an siam thin ang. iv) Property rules-te hi a tul angin Executive Committee-in a ennawn thin ang. v) Kan Unit property-te hi term tawpah audit thin tur a ni anga, Auditor turte chu Executive Committee-in a ruat thin ang.

SECTION ‘B’:

FUND RAISING COMMITTEE

1.	A din chhan: Unit TKP member ten sum tuakna kawngah phur leh chak zawka kan thawhho theihna tura sum tuak chungchang bik ngaihtuah turin Fund Raising Committee hi din a ni.
2.	Memberte: Executive Committee-in Executive Committee member zinga mi, Fund Raising Committee Convener-ah a ruat thin anga, Secretary leh member dangte pawh Executive Committee-in a ruat thin ang. Unit President leh Finance Secretary chu Ex-Officio member an ni ang. Convener leh Secretary baka mawhphurhna dangte chu Fund Raising Committee-in a mamawh dan azirin committee member-te zingah chanvo an inbel anga, Executive Committee-in a pawmpui ang.
3.	A tihturte: i) Unit TKP sumtuakna tur a dap anga, a thawh dan tur pawh Unit Executive Committee-ah rawtna a siam thin ang. Thil tul bikah chuan Unit TKP Office Bearer-te nena inrawn tlangin thutlukna an siam thin ang. ii) Fund Raising Committee hmalakna turah hian Unit TKP planning-a sum tuakna te a tel lovang. Executive Committee-in Planning tihhlawhtlinna turin kut leh keah a hmang thei ang.

SECTION ‘C’:

WORSHIP & EVANGELISM COMMITTEE

1.	A din chhan: Thalaite, Pathian fakna leh chibai bukna lama hma kan sawn theihna atan leh thlarau lama nun tuihal leh chaute tanpui tur leh Krista chanchintha puangdarh zel turin Worship & Evangelism Committee hi din a ni.
2.	Memberte: Chairman leh Secretary hi Unit Office Bearer ten an ruat anga, committee member dangte chu Executive Committee-in tha a tih zat a ruat thin ang. Unit Office Bearer te chu ExOfficio member an ni ang. Chairman leh Secretary baka mawhphurhna dangte chu Worship & Evangelism Committee-in a mamawh dan azirin committee member-te zingah chanvo an inbel anga, Executive Committee-in a pawmpui ang.
3.	A mawhphurhna: Unit TKP member thlarau lama nun tuihal leh chaute tanpui tur leh TKP member ten thlarau lam nuna hma kan sawn theihna tur ruahmanna a siam anga, ruahmanna a siamte chu Unit TKP Executive Committee-ah a hriattir thin ang. Unit TKP member ten zau zawka rawngbawlna an neih theihna turin hma a la ang.
4.	A tihturte: i) Unit TKP-in Praise & Worship Service a neihin a kaihruai ang. ii) A tul angin kan Kohhranin Pathian fakna leh chibai bukna kawnga hma a sawn theih nan hma a la ang. iii) Unit TKP member leh khawtlanga thlarau nun chhawmdawl ngaite chhawmdawla tichak turin programme a siam thin anga, Unit TKP hmalakna leh programme tibuai lovin rawng a bawl thin ang. iv) Unit TKP Executive leh Programme Committee-in tihtur a pekte tihhlawhtlin a tum thin ang. v) A rawngbawlna leh hmalaknate Unit TKP Executive Committee-ah a report thin ang. vi) Tul bik thilah chuan hruaitu leh Unit TKP Office Bearer-te inrawnkhawmin thu an pawtchat thin ang.
5.	Sum hman dan: Unit TKP Executive Committee-in an sum hman theih tur zat a ruahman anga, an hman dan tur pawh Executive Committee-in a hriatpui thin ang.

SECTION ‘D’:

DOCUMENTATION & PUBLICITY COMMITTEE

1.	A din chhan: Documentation & Publicity Committee hi tunlai hmanraw thar (Modern technology) hmanga Pathian ram a lo zau zel theih nana Unit TKP-in rawngbawlna tura a din a ni.
2.	Memberte: Executive Committee-in Executive Committee member zinga mi Documentation & Publicity Committee Convener-ah a ruat anga, Secretary leh member dangte pawh Executive Committee-in a ruat thin ang. Unit TKP Vice-President leh Secretary-te chu Ex-Officio member an ni ang. Convener leh Secretary baka mawhphurhna dangte chu Documentation & Publicity Committee-in a mamawh dan azirin Committee memberte zingah chanvo an inbel anga, Executive Committee-in a pawmpui ang.
3.	A mawhphurhna: Tunlai hmanraw thar (Modern technology) hmanga rawngbawlna tura din a nih ang takin, Unit TKP member zawng zawngte thleng phak tura chanchin tha (Pathian Thu) puandarhte, hriattur tul leh pawimawh hrilhhriatte chu a mawhphurhna a ni anga. Tin, Unit TKP documents pawimawh hrang hrangte pawh vawn him a nih theih nan mawhphurhna a la ang. Tin, he Committee hnuaiah hian Kohhran chanchinbu ‘Petros Weekly’, Unit TKP-in a enkawl hna kan thawh pawh tha taka chhuah chhunzawm a nih zel theih nan mawh a phur tel ang.
4.	A tihturte: i) Tunlai hmanraw thar hrang hrang hmangin Unit TKP rawngbawlna tur a ngaihtuah ang. ii) Member zawng zawngte huap kim thei tur ang berin hma a la thin ang. iii) Tunlai hmanraw thar kaltlanga hman him lo leh zirtirna dik lo laka himna tur ngaihtuah chungin hma a la thin ang. iv) Unit TKP documents leh documents dang vawnhim tul apiang him taka vawnhim dan tur a ngaihtuah anga, documents bo thlau lo awm palhte pawh a neih leh theih dan tur a ngaihtuah thin ang. v) Rawngbawlna tura a mamawhte leh a hmalakna turte Executive Committee-ah a thlen thin anga, thil hmanhmawhtlak bikah chuan Unit TKP Office Bearer-te nen inrawnkhawmin thu tawp an siam thin ang. vi) Sum hman mamawhna a neihin Unit TKP Executive Committee-ah a thlen thin ang. vii) Documentation & Publicity Committee member-te atangin Petros chanchinbu Editor a ruat anga, Executive Committee-ah pawmpui turin a thlen thin ang. viii) Petros Editorial Board member tur Unit TKP member-te atangin tul leh tha a tih zat a ruat anga, Executive Committee-ah pawmpui turin a thlen thin ang.
5.	Petros Editorial Board: i) A chhuah chhan: Petros Weekly hi BCM Ramzotlang chanchinbu, TKP in a enkawl a ni a, Kohhran leh a hnuaia pawl hrang hrangte hmalakna leh hriattirna pawimawhte tarlan nan hman thin tur a ni. Kohhran programme leh hriattirna pawimawhte pawh a tul angin tarlan thin a ni ang. Petros Weekly hi thu leh awm hma chuan Pathianni tin chhuah thin a ni ang. ii) A enkawlna sum: Petros Weekly enkawlna atana sum tuak dan tur, Unit TKP Executive Committee-in kum tirah a duang thin anga, hemi bakah sum indaihlohna avanga sum tuak a tul anih chuan Executive Committee-in a ngaihtuah thin ang. iii) A kalphung leh enkawl dan: Petros Weekly hi Kohhran chanchinbu a nih angin a chhunga thute pawh tawngkam mawi leh thudik tak chauh a ni tur a ni; dawt thu leh tawngkam bawlhhlawhte, Kohhran chhungkua leh mimal insawichhiatna thute tarlan loh tur a ni. Politics lam rawngkai thute pawh ziahlan loh tur a ni. Petros Weekly-ah hian chhiatni/thatni chungchanga lawmthusawina leh advertisement (Kohhran thil nilo) te tihlan loh tur a ni. Kan Kohhran member boral an awmin tuarpuina thu a chhuah tel thin ang. Chhuah tura thu thehluhte chu Editorial Board-in ngun takin a endik anga, chhuah tlaka ngaih chauh tihchhuah tur a ni. iv) Editor: Petros Editor hi a nihna avangin Programme Committee-ah member a ni ang. v) Inneih sawmna chhuah dan: BCM Ramzotlang leh BCM Serkawn member zingah Kohhran Dan Puitlinga innei tur an awmin, innei tur ten an duh chuan inneih sawmna card angin chhuahsak tur a ni. Dantea innei turte chuan sawmna chhuah an duh chuan news item anga chhuahsak theih an ni ang.

SECTION ‘E’:

REFRESHMENT & DECORATION COMMITTEE

1.	A din chhan: Refreshment & Decoration Committee hi Unit TKP-in programme leh activities a neih hrang hranga hmunhma buatsaih leh chei hnate, ei leh in thianghlim leh tuihnai zawkte mumal leh falfai taka buatsaiha a awm theih nana din a ni.
2.	Memberte: Executive Committee-in Executive Committee member zinga mi, Refreshment & Decoration Convener-ah a ruat thin anga, Secretary leh member dangte pawh Executive Committee-in a ruat thin ang. Unit TKP Treasurer chu Ex-Officio member a ni ang. Convener leh Secretary baka mawhphurhna dangte chu Committee-in a mamawh dan azirin Committee member-te zingah chanvo an inbel anga, Executive Committee-in a pawmpui ang. Tin, Convener hi a nihna avangin Programme Committee-ah member a ni ang.
3.	A tihturte: i) Unit TKP Planning tihhlawhtlinna tur leh Tualchhung Kohhran atanga mawhphurhna kan neih tihhlawhtlinna kawngah Executive Committee-in kut leh keah a hmang thei ang. ii) TKP inkhawm leh fellowship-ah te hmunhma a buatsaih fel thin ang. iii) Pathianni zinga Biak Ina pangpar khawi tur a ruat fel thin ang. iv) Decoration hmasawnna tur a ngaihtuah thin anga, a tihhlawhtlin dan tur pawh a tul dan angin Executive Committee-ah a thlen thin ang. v) Executive Committee leh Programme Committee-in tihtur a pekte tihhlawhtlin a tum thin anga, chumi piah lama hmalak erawh a rem lovang. vi) Sum hman mamawhna a neihin, Unit TKP Executive Committee-ah a thlen thin ang. vii) Tul bik thilah chuan Unit TKP Office Bearer-te nen inrawnkhawmin thu an pawtchat thin ang.